Големиот пожар што во ноќта меѓу 13 и 14 август го зафати подрачјето на Локва Рогозница и Омиш зад себе остави огромна материјална штета. Целосно изгореле 106 возила, 28 куќи и 45 пловила, соопшти сплитско-далматинскиот жупан Блаженко Бобан.
Во пожарот целосно биле уништени и седум деловни објекти, три угостителски објекти и шест помошни објекти покрај семејни куќи. Делумно биле оштетени уште 43 куќи, 20 возила и девет пловила. Штетата на земјоделските површини, меѓу кои и маслиновите насади, сè уште не е проценета.
По завршувањето на проценката, градот Омиш треба да ги достави податоците за штетата, по што ќе биде поднесено барање за прогласување природна непогода. Хрватската влада најави финансиска помош за Омиш и околните места, откако ќе бидат утврдени вкупните последици од пожарот.
Според досегашните наоди од истрагата, пожарот избувнал на 13 август околу 20 часот во шумски предел покрај пат во Локва Рогозница. Поради силниот ветер, огнот брзо се проширил кон Омиш, зафаќајќи подрачје долго околу 23 километри и широко околу 1,5 километар. Изгореле околу 1.000 хектари трева, ниска вегетација и борова шума.
Во пожарот загинало едно лице, а десетици луѓе биле повредени. Според Државното обвинителство, 38 лица се повредени, од кои 10 биле хоспитализирани поради сериозно нарушена здравствена состојба. Хрватската противпожарна заедница, пак, соопштила бројка од 43 повредени, меѓу кои и тројца пожарникари.
Во текот на ноќта биле евакуирани околу 2.500 лица, кои биле сместени во прифатни центри.
Причината за пожарот сè уште не е утврдена. Полицијата, инспектор за заштита од пожари и експлозиви и државното обвинителство извршиле увид на местото од каде што започнал огнот. Истражителите собираат снимки од безбедносни камери од целото погодено подрачје, а се врши и детално снимање и фотографирање на опожареното подрачје, како и на уништените објекти и возила.
