Цените на нафтата денеска нагло пораснаа на меѓународните пазари, при што цената на барелот на лондонскиот пазар се приближи до 91 долар. Причина за растот се новата ескалација на Блискиот Исток и значителниот пад на резервите на сурова нафта во САД.
На лондонскиот пазар цената на барелот достигна 90,66 долари, што е за 6,57 долари повеќе од претходниот ден, додека на американскиот пазар барелот се тргуваше за 85,24 долари, со раст од 5,98 долари.
Пазарите реагираа на новите судири во регионот, откако американските и саудиските сили извршија напади врз цели во Ирак. Од американската Централна команда (CENTCOM) соопштија дека цел на нападите биле групи кои, според нив, извршиле напади врз американски сили и врз саудиска енергетска инфраструктура.
Во меѓувреме, Иран соопшти дека нема поврзаност со ракетните напади врз цели во Саудиска Арабија, но Иранската револуционерна гарда објави дека извршила напад врз американска воена база во Јордан.
Дополнителна загриженост предизвикаа и изјавите на ирански воени претставници дека бродовите не треба да минуваат низ Ормускиот Теснец без дозвола од Техеран. Иранската револуционерна гарда соопшти и дека запрела три нафтени танкери во Ормускиот Теснец, тврдејќи дека пловеле по „небезбедна и незаконска рута“.
Растот на цените беше поттикнат и од најновите податоци на американското Министерство за енергетика, според кои комерцијалните резерви на сурова нафта во САД минатата недела се намалиле за 7,3 милиони барели.
Во исто време, стратешките резерви на САД се намалиле за дополнителни 3,8 милиони барели и паднале на 307,7 милиони барели, што е најниско ниво од првата половина на 1980-тите години.
