Руската тенисерка Алиса Октјабрева го освои јуниорскиот Ролан Гарос, а по триумфот во Париз не штедеше пофални зборови за својот најголем спортски идол – Новак Ѓоковиќ.
Седумнаесетгодишната тенисерка, која моментално е 309. на ВТА-листата, во финалето убедливо ја совлада кинеската Сун Синран со 6:2, 6:1 и ја освои најголемата титула во својата досегашна кариера.
„Ова ми значи многу. Секојпат кога ќе го погледнам овој трофеј, ќе се сетам на целиот пат и на трудот што го вложивме јас и мојот тим. Успеавме“, изјави Октјабрева за Punto de Break.
Таа призна дека по полуфиналето почнала вистински да верува дека може да стигне до титулата, но најголемо внимание привлече кога зборуваше за Ѓоковиќ.
„Мојот главен идол е, без никакво сомнение, Новак Ѓоковиќ. Му се восхитувам на неговиот менталитет и менталната сила. Го обожавам начинот на кој се справува со тешките ситуации“, рече младата Русинка.
Таа додаде дека најмногу ја фасцинира способноста на српскиот тенисер сам да пронајде решение кога работите не одат според планот.
„Не би рекла дека целосно ги контролира емоциите, бидејќи тоа е тешко за секој човек. Но, неговата способност да излезе од комплицирани ситуации е неверојатна“, истакна Октјабрева.
Новата јуниорска шампионка на Ролан Гарос откри и дека како помлада била темпераментна на теренот, па токму затоа во Ѓоковиќ гледа пример од кој може да учи.
