Нови апсења во Србија по пронаоѓањето изгорени човечки останки закопани кај Пожаревац

Повеќе лица се уапсени во Србија под сомнение дека учествувале во убиството на Милан Стоковиќ, чие тело било пронајдено закопано во близина на Пожаревац. Полициската акција се спроведува на повеќе локации низ земјата, во соработка со Јавното обвинителство за организиран криминал.

Според информациите што ги пренесуваат српските медиуми, апсењата започнале вчера, а акцијата сè уште е во тек. Се вршат претреси на повеќе места, а истрагата против групата осомничена за поврзаност со ликвидации трае подолг период. Дел од нејзините припадници веќе се зад решетки.

— реклама —

Како што објавува „Блиц“, уапсените се осомничени за учество во убиството на Стоковиќ, чие тело било пронајдено закопано во близина на Пожаревац. Човечките останки биле откриени по апсењата во март на осомничени за убиството на Живко Бакиќ. Телото било пронајдено во импровизиран гроб, а останките биле запалени. ДНК-анализата потврдила дека станува збор за Стоковиќ, по што телото ѝ било предадено на неговото семејство.

— реклама —

За бруталното убиство на Стоковиќ се дознало по апсењето на неколку припадници на организирана криминална група, која се поврзува и со убиството на Бакиќ на 19 јануари годинава, во близина на Авала.

Според сомневањата на истражителите, Стоковиќ бил убиен на 14 октомври минатата година. Српското Министерство за внатрешни работи претходно соопштило дека на 19 октомври, во областа меѓу селата Речица и Рама кај Пожаревац, полицијата затекнала двајца мажи како копаат дупка во која планирале да ја сместат жртвата.

— реклама —

Во близина на импровизираниот гроб биле пронајдени 24 литри солна киселина и 50 килограми вар, за кои постои сомнение дека требало да послужат за уништување на трагите и останките од телото.

Тогаш истрага била поведена против полициски инспектор од Пожаревац, означен со иницијалите Н. Ж., и жител на областа со иницијали М. С. До апсењето на осомничената група не било познато каква е поврзаноста меѓу исчезнувањето на Стоковиќ и настанот кај Пожаревац.

Собраните докази и понатамошната истрага довеле до првите апсења и делумна реконструкција на настаните.