Од ноќеска на сила стапуваат новите цени на горивата, согласно најновата одлука на Регулаторната комисија за енергетика (РКЕ), со која малопродажните цени на нафтените деривати во просек се зголемуваат за 1,47 проценти.
Најголема промена има кај дизелот, чија цена ќе биде повисока за 2,5 денари по литар. Цената на бензините се зголемува за 1 денар по литар, додека екстра лесното масло за домаќинство поскапува за 2 денари. За разлика од останатите деривати, мазутот ќе се продава по пониска цена, односно ќе поевтини за 0,265 денари по килограм.
Од Регулаторната комисија посочуваат дека новата корекција е направена врз основа на движењата на референтните цени на светските пазари. Во последниот пресметковен период цената на бензините е зголемена за 2,576 проценти, дизелот за 5,201 процент, а екстра лесното масло за 4,681 процент, додека мазутот бележи намалување од 0,967 проценти.
Во формирањето на новите цени е земена предвид и промената на девизниот курс, при што американскиот долар во однос на денарот во анализираниот период забележал раст од 1,5132 проценти.
