Нови детали за убиствата во Ѓорче Петров: Четворицата осомничени можат да добијат и доживотен затвор

Основното јавно обвинителство Скопје отвори истрага против четири лица осомничени за две тешки разбојништва во скопските населби Хром и Ѓорче Петров, при кои животот го загубиле две лица. За сите осомничени е побаран притвор.

— реклама —

Според обвинителството, првиот напад се случил во раните утрински часови на 22 октомври, кога осомничените насилно влегле во куќа во Хром. Сопственикот го врзале за рацете и нозете, го удирале по главата и телото, а потоа го задушиле со перница. Од домот одзеле пари и златен накит во вредност од околу 300.000 денари.

Истиот ден, еден од осомничените ги однел останатите со автомобил до златарница во Старата скопска чаршија, каде што го продале украдениот накит за 2.840 евра.

— реклама —

Вториот напад се случил ноќта меѓу 26 и 27 октомври во Ѓорче Петров. Осомничените физички ја нападнале сопственичката на куќата, ја удирале, ѝ ги врзале рацете, нозете и устата, а потоа ја однеле во бањата. Жената починала од здобиените удари. Од домот биле одземени пари, накит и вредни предмети во вредност од околу 200.000 денари. И овој пат украдениот златен накит бил продаден.

— реклама —

Четворицата се осомничени за две кривични дела разбојништво во тежок облик, бидејќи жртвите со умисла биле лишени од живот. За ова дело е предвидена казна затвор од најмалку 10 години или доживотен затвор.

Обвинителството до судијата на претходна постапка доставило предлог за определување притвор за сите четворица осомничени.

Во претходната постапка, четворицата беа приведени и задржани во 48-часовен притвор, а потоа им беше продолжен притворот за уште 30 дена. Според информациите објавени претходно, станува збор за лица на возраст од 20, 22, 26 и 58 години.