Центарот за управување со кризи објави детали за трагедијата што утринава се случи во скопската населба Кисела Вода, каде тројца градежни работници беа затрупани при ископ на темели на градилиште на улицата „Козјак“.
Според ЦУК, првиот повик за несреќата бил примен во 08:14 часот, кога било пријавено дека работници се затрупани со земја и била побарана Итна медицинска помош.
Само четири минути подоцна, во 08:18 часот, следел втор повик од доктор Драган Панов од Итната медицинска помош Скопје, кој побарал асистенција од Бригадата за противпожарна заштита за извлекување на затрупаните лица.
Веднаш биле известени сите надлежни служби – Бригадата за противпожарна заштита Скопје, полицијата, Итната медицинска помош и Регионалниот центар за управување со кризи Скопје.
Претходно, Министерството за внатрешни работи информираше дека настанот бил пријавен во 08:17 часот, по што започнала спасувачката акција. Двајца од работниците се извлечени и пренесени во Комплексот клиники „Мајка Тереза“, додека третиот сè уште е под урнатата земја.
Акцијата за спасување продолжува, а институциите работат на расчистување на случајот и утврдување на причините за несреќата.
