Директорот на Дирекцијата за заштита и спасување, Стојанче Ангелов, изјави дека пожарот кај кавадаречкото село Раовец бил намерно подметнат и, според неговите информации, станува збор за криминални мотиви.
Тој посочи дека полицијата веќе разговарала со осомничено лице и дека во тек е прибирање докази. Според Ангелов, сторителот го подметнувал огнот на повеќе места, оддалечени околу стотина метри едно од друго, со што уште на самиот почеток создал долга пожарна линија и го отежнал гаснењето.
Иако пожарот претходно бил локализиран, попладнево повторно се разгорел и се проширил кон стрмен и тешко пристапен терен во близина на Тиквешкото Езеро. Ангелов оцени дека е малку веројатно огнот целосно да биде ставен под контрола во текот на денот и најави дека интервенцијата најверојатно ќе продолжи и во текот на ноќта.
Во гаснењето се вклучени два авиона „Ер трактор“ на Дирекцијата за заштита и спасување, како и полициски и армиски хеликоптер. На терен интервенираат и пожарникари, припадници на МВР, Граничната полиција, Шумското стопанство и механизација обезбедена од локалните власти.
Градоначалникот на Кавадарци, Митко Јанчев, информираше дека се ангажирани четири специјализирани возила „Пинцгауер“, два „Унимога“, камион и повеќе теренски возила, а апелираше граѓаните да не се приближуваат до зафатеното подрачје и да пријават доколку забележат нови жаришта или сомнително однесување.
Иако Ангелов изјави дека пожарот бил подметнат од криминални мотиви, конечните околности и евентуалната кривична одговорност ќе се утврдуваат во полициската и обвинителската постапка.
(Видео) Пожарот кај Кавадарци повторно се разгоре, интервенираат два ер-трактори
Пожарот во кавадаречкиот регион повторно е реактивиран и се проширил на тешко пристапен терен, информира директорот на Дирекцијата за заштита и спасување, Стојанче Ангелов.Според Ангелов, во гаснењето веќе се вклучени два ер-трактори на Дирекцијата за заштита и спасување, кои дејствуваат од воздух во обид да го стават пожарот под контрола.На терен е и градоначалникот на Кавадарци, Митко Јанчев, кој ја следи состојбата и координацијата на активностите за справување со пожарот.
Настани | пред 7 часа
