Нови детски реквизити и урбана опрема во повеќе населени места во Општина Илинден

Општина Илинден преку соопштение најави дека продолжува со вложувањата во уредување и модернизација на јавните простори, при што во изминатиот период беа обновени повеќе детски игралишта и беше поставена нова урбана опрема во неколку населени места.

— реклама —

Во рамки на активностите, на игралиштето кај Домот на културата во Кадино се поставени нови детски реквизити, меѓу кои лулашка, лизгалка и две фигури во форма на коњче. Дополнително, на игралиштето меѓу улиците „525“ и „500“ поставени се нова лизгалка, лулашка и клацкалка, како и клупи и корпи за отпадоци.

Подобрени услови доби и детското игралиште покрај пешачката патека Марино–Кадино, каде што е извршено бетонирање на просторот и поставени се нова лулашка, клацкалка и две детски фигури. Во населеното место Илинден, пак, на игралиштето на улицата „30“ се поставени дополнителни реквизити за игра, меѓу кои лизгалка и клацкалка.

— реклама —

Во рамки на тековните активности, поставена е и нова автобуска постојка во Кадино, во близина на „Пекабеско“.

— реклама —

Градоначалникот на Општина Илинден, Александар Георгиевски, апелираше до граѓаните одговорно да се однесуваат кон јавната инфраструктура и урбаната опрема, истакнувајќи дека општината континуирано инвестира во изградба и одржување на игралишта, паркови и други јавни содржини.

Тој нагласи дека зачувувањето на јавните добра е заедничка обврска на сите граѓани и важен предуслов за создавање уредена, модерна и функционална локална заедница.

Од Општина Илинден ги повикуваат жителите навремено да пријавуваат евентуални оштетувања или несовесно користење на јавните површини, со цел тие да останат безбедни, уредни и достапни за сите граѓани.