Во Загреб и денеска се спроведуваат евакуации на ученици поради дојави за наводно поставени експлозивни направи, потврдуваат локалните власти и полициските служби.
Според првичните информации, евакуирана е гимназијата „Луцијан Врањанин“ во западниот дел на градот, а полицијата реагира на повеќе пријави кои пристигнале и до други училишта, вклучително и во Сплит. Дел од известувањата биле испратени и до редакции на медиуми, што дополнително ја проширило паниката.
Од Полициската управа во Загреб соопштуваат дека се запознаени со ситуацијата и дека се преземаат сите потребни безбедносни мерки на терен.
Овие нови дојави доаѓаат по серијата слични инциденти минатата недела, кога низ Хрватска беа пријавени повеќе од 500 лажни закани за бомби во училишта, градинки, институции и дел од медиумите. Тогаш наставата во повеќе градови беше привремено прекината, а учениците беа евакуирани.
По спроведените проверки, полицијата утврди дека сите претходни дојави биле лажни.
Истрагата за најновите пријави е во тек, а надлежните апелираат на смиреност и почитување на безбедносните процедури.
