Српска листа очекува на предвремените парламентарни избори во Косово, кои ќе се одржат во недела, да ги освои сите десет пратенички места што, според Уставот на Косово, се загарантирани за српската заедница.
На завршниот предизборен митинг, претставниците на партијата порачаа дека освојувањето на сите десет мандати ќе им овозможи поефикасно да ги застапуваат интересите на Србите во косовските институции.
Српска листа, која има блиски врски со владејачката Српска напредна странка во Србија, на претходните избори освои девет од десетте загарантирани места за српската заедница.
Во пресрет на изборите, официјалниот Белград повторно ги повика косовските Срби да излезат на гласање и да ја поддржат Српска листа.
Директорот на Канцеларијата за Косово и Метохија при Владата на Србија, Петар Петковиќ, изјави дека е важно сите Срби со право на глас, без разлика дали живеат во Косово или се раселени во Србија, да учествуваат на изборите.
„Успехот на Српска листа значи посилно претставување на српските интереси во Косово и борба за правата и иднината на српската заедница“, изјави Петковиќ.
Косово во недела ќе ги одржи третите парламентарни избори во последните 16 месеци. До новото гласање доаѓа откако политичките партии не успеаја да постигнат договор за избор на нов претседател на државата по завршувањето на мандатот на Вјоса Османи.
Изборите се одржуваат во услови на продолжена политичка неизвесност, додека движењето Самоопределување на премиерот во технички мандат, Албин Курти, се надева на нова изборна победа.
