Италијанскиот Сенат ја усвои изборната реформа предложена од владата на премиерката Џорџа Мелони, со која победничката коалиција би можела да обезбеди големо парламентарно мнозинство и со помалку од половина од освоените гласови.
За реформата гласаа 113 сенатори, додека 71 беа против. За да стапи во сила, законот треба да биде одобрен и од Претставничкиот дом, каде што гласањето се очекува на 28 септември.
Според предлогот, коалицијата која на изборите ќе освои најмалку 42 отсто од гласовите би добила дополнителни 70 пратенички места во Претставничкиот дом и 35 во Сенатот. На тој начин победничката коалиција би можела да обезбеди стабилно мнозинство и без да освои повеќе од 50 отсто од гласовите.
Мелони смета дека ваквиот изборен систем би донел поголема стабилност на италијанските влади и би ги намалил долгите преговори за формирање владејачки коалиции по изборите.
Опозицијата, пак, ја обвинува владата дека изборните правила се менуваат пред парламентарните избори во 2027 година со цел Мелони и нејзината десничарска коалиција да ги зголемат шансите за останување на власт. За време на расправата, опозициските пратеници истакнаа транспаренти со порака „Не на законот за измама“.
Владејачката коалиција ја сочинуваат партијата „Браќа на Италија“ на Мелони, „Лига“ и „Напред Италија“. На власт е речиси четири години. Доколку Претставничкиот дом ја потврди реформата, новите правила би можеле да се применуваат веќе на следните парламентарни избори.
