Регулаторна комисија за енергетика донесе нови Правила за сајбер безбедност за објектите за производство, складирање и системите за пренос и дистрибуција на електрична енергија.
Од Регулаторната комисија посочуваат дека со новите правила се зајакнува заштитата на енергетскиот систем од сајбер напади и технолошки ризици, во согласност со европските стандарди.
Правилата ќе важат за МЕПСО, Електродистрибуција, МЕМО, снабдувачите со електрична енергија, големите производители, операторите на складишта за електрична енергија, НОМАГАС, операторите за дистрибуција на гас и операторите на постројки за производство на водород или биогас.
Со новите правила се предвидуваат протоколи за управување со ризици, инциденти и кризни состојби, како и процедури за известување при значајни сајбер напади, планови за закрепнување и обуки за подигање на свеста.
Енергетските компании кои управуваат со критична инфраструктура ќе треба во рок од 30 дена да назначат службеник за сајбер безбедност, во рок од шест месеци да формираат специјализирани тимови, а во рок од една година да изработат проценка на ризици, планови за закрепнување и системи за резервни копии.
Од РКЕ оценуваат дека станува збор за нов регулаторен модел кој, наместо само техничка заштита, воведува управување со национално-критични ризици во енергетскиот сектор.
