Полицијата презема мерки за расчистување на два одделни случаи на физички напади меѓу малолетници, кои биле пријавени во Скопје.
Според информациите од Министерството за внатрешни работи, на 2 јули во 11:30 часот во СВР Скопје, 38-годишна жена пријавила дека на 21 јуни околу 21:00 часот, на подрачјето на Карпош, нејзиниот малолетен син бил физички нападнат од неколку малолетници, од кои двајца ги познавал.
Истиот ден, околу 23:35 часот, во СВР Скопје било пријавено дека на подрачјето на Центар малолетничка била физички нападната од две други малолетнички кои ги познавала.
Од МВР информираат дека во двата случаи се преземаат мерки за целосно расчистување на околностите.
