(Видео) Нови судири во Тирана: Демонстрантите палат канти и фрлаат камења кон полицијата

Нови судири меѓу демонстрантите и полицијата избувнаа денеска во Тирана, каде што неколку десетици лица со качулки запалија канти за отпад пред зградата на Министерството за образование и фрлаа камења кон полициските службеници. Инцидентите се случија на почетокот на новиот протест организиран од студенти, кои бараат оставка од премиерот Еди Рама, јавува АФП.

Протестот започнал мирно, со собир на неколку стотици граѓани пред Министерството за образование. Демонстрантите извикувале „Рама, поднеси оставка!“ и „Нема Албанија без млади!“ Подоцна, група млади лица со качулки запалила неколку канти за отпад, а потоа почнала да вади камења од тротоарот и да ги фрла кон полицијата.

— реклама —

Во близина на Министерството биле распоредени голем број припадници на специјалните полициски единици, а на местото бил присутен и воден топ.

— реклама —

Протестите против владата во Албанија траат со месеци, а започнале во мај поради спорен проект за изградба на туристички објекти на албанското крајбрежје, од кој корист би имал соработник на американскиот претседател Доналд Трамп. Незадоволството подоцна се проширило и поради обвинувањата за корупција, состојбите во здравствениот систем и недостигот од можности за младите.

— реклама —

Од средината на октомври протестите станале сè понасилни, при што биле запалени или оштетени повеќе јавни објекти, меѓу кои министерства и судници, како и бројни продавници.

Албанскиот министер за внатрешни работи Ервин Демо вчера соопшти дека од почетокот на насилните судири биле повредени речиси 350 лица, меѓу кои околу 200 полицајци, 100 демонстранти и 40 минувачи. Според него, досега биле уапсени 269 малолетници.

Албанската влада во средата најавила построги казни за насилството за време на протестите, вклучително и парични казни што може да достигнат 5.500 евра.