Министерството за внатрешни работи доби нови возила и специјализирана опрема обезбедени преку регионалниот ИПА-проект EU4FAST, со поддршка од Европската Унија, информираше министерот Панче Тошковски.
Тој посочи дека утринава во кругот на МВР било извршено примопредавањето на опремата, која веднаш ќе биде ставена во функција на македонската полиција.
Станува збор за четири теренски возила, три комбиња, видеокамери, детектори за отчукување на срце и опрема за проверка на документи, кои ќе придонесат за поголема мобилност на полициските служби, подобра контрола на границите и поефикасна борба против криумчарењето мигранти и трговијата со луѓе.
„Во време кога безбедносните предизвици се сè покомплексни и не познаваат граници, инвестициите во модернизација на полицијата се инвестиции во безбедноста на граѓаните и стабилноста на регионот“, истакна Тошковски.
Тој упати благодарност до Европската Унија и до сите партнери кои континуирано ја поддржуваат заложбата за посилни институции, владеење на правото и поефикасна борба против организираниот криминал.
„Остануваме посветени на градење модерна, професионална и добро опремена полиција која успешно ќе одговори на сите современи безбедносни предизвици“, порача министерот.
