Ново Лисиче сè уште чека зонско паркирање: Со месеци се обележуваат паркинзите

И покрај најавите од пред неколку месеци, зонското паркирање во Реонски Центар, Ново Лисиче и Автокоманда сè уште не е ставено во функција, а надлежните не прецизираат кога ќе започне неговата примена.

— реклама —

Од Општина Аеродром велат дека подготовките за воведување на зонското паркирање во Реонски Центар и Ново Лисиче се во завршна фаза. Во моментов, ЈП „Улици и патишта“ работи на обележување на паркинг-местата и поставување на соодветната сообраќајна сигнализација, по што ЈП „Градски паркинг“ ќе започне со имплементација на новиот режим.

— реклама —

Од Град Скопје посочуваат дека активностите во Ново Лисиче сè уште се во тек, а зонското паркирање ќе биде пуштено во употреба по завршувањето на поставувањето на целокупната вертикална и хоризонтална сигнализација и по добивањето на потребната согласност од СВР Скопје.

— реклама —

Во меѓувреме, во Автокоманда, каде што проектот беше најавен уште минатата година, од Град Скопје информираат дека, според информациите добиени од Општина Гази Баба, во тек е постапката за обележување на паркинг-местата и поставување на сообраќајната сигнализација. По завршувањето на овие активности ќе следува воведување на зонското паркирање.

Иако подготовките се во тек на сите три локации, надлежните засега не соопштуваат конкретен датум кога зонското паркирање ќе почне да функционира.