Скопје прави нов чекор кон зајакнување на филмската уметност и културната понуда во градот, преку воспоставување долгорочна соработка со „Скопје Филм Студио“ и Скопскиот филмски фестивал.
Градоначалникот Орце Ѓорѓиевски и Томи Салковски, управител на „Скопје Филм Студио“ и организатор на Скопскиот филмски фестивал, потпишаа Меморандум за соработка со кој се предвидува партнерство насочено кон развој на филмската уметност, збогатување на културната понуда и поголема меѓународна афирмација на Скопје.
Според Ѓорѓиевски, Скопје има богата филмска традиција, бројни талентирани автори и публика која заслужува квалитетна и достапна културна содржина. Соработката треба да создаде услови за понатамошен развој на фестивалот и негово посилно позиционирање на регионалната и европската културна сцена.
Предвидени се европски филмски програми, меѓународни партнерства и активности наменети за младата публика, со што ќе се отворат нови можности за филмските автори и ќе се придонесе кон поголема афирмација на македонската кинематографија пред европската публика.
Партнерството се воспоставува во пресрет на „Скопје 2028 – Европска престолнина на културата“, со цел преку нови културни соработки да се придонесе кон долгорочен развој на културниот живот во градот.
„Скопје има приказни што заслужуваат да го обиколат светот и таленти што заслужуваат поддршка. Наша обврска е да им овозможиме простор да создаваат и да успеваат“, порача Ѓорѓиевски.
