Обвинителството: Нема докази за шпионирање во Кабинетот на претседателката

Нема докази дека во Кабинетот на претседателката Гордана Сиљановска-Давкова имало неовластен пристап до компјутерскиот систем или прибирање класифицирани податоци, соопшти Основното јавно обвинителство за гонење на организиран криминал и корупција (ОЈО ГОКК).

По спроведената предистражна постапка, надлежниот јавен обвинител донел резолуција со која утврдил дека нема основ за натамошно јавнообвинителско постапување.

— реклама —

Сомнежите за наводна шпионажа во Кабинетот на претседателката претходно биле доставени до Обвинителството преку анонимна кривична пријава. Во неа како осомничен бил посочен ИТ администратор во Кабинетот, а биле споменувани и други функционери од Кабинетот и Агенцијата за разузнавање.

— реклама —

Во текот на постапката, по наредба на Основниот кривичен суд била обезбедена компјутерска опрема, врз која биле извршени информатичко-форензички анализи. Биле анализирани и податоци од мобилни уреди, а биле прибрани и известувања од лица запознаени со настанот.

„Според извештаите на Секторот за компјутерски криминал при МВР не се утврдени дигитални траги или други форензички показатели за неовластено навлегување во компјутерскиот систем, ниту се пронајдени докази за снимање и прибирање класифицирани податоци“, соопшти ОЈО ГОКК.

— реклама —

Од Обвинителството додаваат дека при анализите биле констатирани одредени безбедносни и административни слабости во конфигурацијата на системот, кои можеле да претставуваат потенцијален безбедносен ризик.

Сепак, не биле утврдени дигитални траги или други докази за извршување на пријавените кривични дела.

По оценката на сите прибрани докази, надлежниот обвинител утврдил дека нема основ за натамошно постапување во врска со наводите за неовластен пристап до компјутерскиот систем и неовластено прибирање податоци.