Основното јавно обвинителство Скопје поднесе жалба на првостепената ослободителна пресуда во предметот „Талир 2“, кој се однесува на изградбата на седиштето на ВМРО-ДПМНЕ.
Од Обвинителството информираа дека надлежниот јавен обвинител ја примил првостепената пресуда и во законскиот рок вложил жалба.
Пред неполн месец, Кривичниот суд донесе ослободителна пресуда за поранешниот премиер Никола Груевски, кој беше обвинет во случајот „Талир 2“ за незаконската изградба на партиското седиште на ВМРО-ДПМНЕ.
При образложението на пресудата, судијката Даниела Алексовска-Стојановска посочи дека одлуката произлегува од измените на Кривичниот законик од 2023 година, оценувајќи дека тие значително влијаеле врз елементите на кривичното дело.
Според актуелните рокови, предметот застарува на крајот на август, што значи дека не се очекува поинаква судска разрешница, туку констатирање на застареност. Сепак, и во таков случај останува можност за постапка поврзана со евентуална конфискација на објектот познат како „Белата палата“ на ВМРО-ДПМНЕ.
Пред три години ситуацијата беше поинаква, кога постоеше првостепена осудителна пресуда со која Груевски беше осуден на шест години затвор, Кирил Божиновски доби условна казна, а беше изречена и конфискација на партискиот имот. Сепак, пресудата подоцна беше укината од Апелацискиот суд по измените на Кривичниот законик, по што постапката започна одново.
Во меѓувреме, поради застареност на делото, кривичниот прогон против Кирил Божиновски беше запрен, додека постапката против Груевски и политичката партија продолжи.
