Крилото на Зијадин Села од Алијанса за Албанците обвини дека се прави сериозен стратешки пресврт со пренасочување на Коридорот 8, што, според нив, оди во корист на Србија и Коридорот 10.
Според партијата, изјави на српски функционери, пренесени од агенцијата БГНЕС, укажуваат дека ваквите потези се претставуваат како „победа на Србија против Западот“, при што инвестициите се насочуваат кон Коридорот 10, кој ја поврзува Србија со Грција и ја позиционира како регионален центар.
Од Алијанса за Албанците тврдат дека министерот за транспорт, Александар Николовски, се обидел да ги пренасочи средствата обезбедени за Коридорот 8, што, според нив, директно ја менува стратешката позиција на државата.
Партијата оценува дека со блокирањето на делницата Требениште–Струга, градот останува надвор од Коридорот 8, а како следен чекор предупредуваат дека изолирани би можеле да останат и Полошкиот и Кичевскиот регион. Наместо тоа, како што наведуваат, приоритет се дава на автопатот Битола–Охрид, со што трасата се пренасочува и се поврзува со Коридорот 10.
Во соопштението се повикуваат партиите од коалицијата ВАЛЕН да не молчат, туку да се спротивстават на, како што велат, „штетните проекти“, оценувајќи дека станува збор за прашање од национално значење кое бара пошироко политичко обединување и вклучување на меѓународниот фактор, вклучително и САД, НАТО и Европската Унија.
