Коридорот 8 мора да се гледа како единствен стратешки проект, а не како одделни делници, порача Петрова пред средбата со Муцунски

Коридорот 8 треба да се развива како единствен стратешки проект за поврзување, а не како низа одделни инфраструктурни сегменти, порача министерката за надворешни работи Велислава Петрова на меѓународниот форум посветен на Коридорот 8 во Софија.

Петрова оцени дека Бугарија има политичка волја за забрзување на активностите околу проектот, кој го опиша како значаен за поврзувањето со Западниот Балкан и за поширокото европско поврзување.

— реклама —

„Коридорот 8 е проект од стратешко значење за нас и со години е приоритет, но работата на него не секогаш се одвивала со потребното ниво на активност“, изјави таа.

Според Петрова, состанокот во Софија е можност да се задржи политичкиот замав, но и да се утврди состојбата со конкретните проекти и сегменти. Таа нагласи дека Коридорот 8 не треба да се третира само како збир од помали инфраструктурни зафати, туку како единствен коридор што треба да биде завршен.

— реклама —

Во тој контекст, таа го поврза проектот и со пошироките планови за европско транспортно и економско поврзување. Петрова посочи дека Бугарија следната година ќе биде домаќин на самит посветен на поврзувањето, со фокус на Средниот коридор.

Таа оцени дека Коридорот 8 има важна улога во поврзувањето на Средниот коридор со Европа и Западниот Балкан и порача дека неговиот развој не смее да биде занемарен.

— реклама —

Петрова нагласи и дека Коридорот 8 не треба да се ограничува само на железничката инфраструктура. Според неа, проектот има потенцијал и за енергетско поврзување и за воена мобилност.

„Важно е да се развива повеќе од еден вид инфраструктура. Секоја компонента – железничката инфраструктура и конкретните делници што со години останале недовршени – е важна“, рече Петрова, додавајќи дека проектот треба да се гледа сеопфатно.

— реклама —

Министерката оцени дека завршувањето на Коридорот 8 е реална цел и посочи дека на неодамнешни состаноци со Министерството за транспорт биле утврдени техничките параметри, додека се работи и на почитување на роковите.

Петрова нагласи дека конкретните технички параметри и роковите се во надлежност на Министерството за транспорт, но оти владата има јасна политичка определба за реализација на проектот и обезбедување на негово навремено завршување.