Обвинувања за закани и институционален притисок: ВМРО-ДПМНЕ за улогата на Заев и Филипче во случајот „Жан Митрев“

Владејачката партија ВМРО-ДПМНЕ излезе со сериозни обвинувања против поранешниот премиер Зоран Заев и поранешниот министер за здравство Венко Филипче, тврдејќи дека двајцата, додека биле на власт, се обиделе да ја преземат приватната болница на докторот Жан Митрев преку закани, уцени и злоупотреба на институциите.

— реклама —

Според соопштението на ВМРО-ДПМНЕ, обвинувањата се темелат на сведоштвото на д-р Митрев, изнесено во интервју на национална телевизија, во кое тој тврди дека во периодот кога против него се водел судски процес, институциите биле искористени како средство за притисок. Како што се наведува, во тој период му биле блокирани личната сметка и сметката на болницата, а била воведена и забрана за продажба на клиниката.

— реклама —

Од партијата посочуваат дека особено спорен е наводот според кој, само една недела откако одредени лица од тогашната власт изразиле интерес за сопствеништвото над болницата, Јавното обвинителство ја укинало забраната за продажба, што, според ВМРО-ДПМНЕ, укажува на директно политичко влијание врз правосудството.

Во соопштението се наведува и дека постоел обид болницата да биде откупена по цена значително пониска од нејзината реална пазарна вредност, што партијата го квалификува како „организиран грабеж под маската на институционално постапување“.

— реклама —

ВМРО-ДПМНЕ дополнително оценува дека ваквите наводи ја прикажуваат „вистинската слика“ на тогашната власт, посочувајќи дека во време на ковид-пандемијата, кога граѓаните секојдневно умирале, а вакцините доцнеле, поранешните функционери, наместо да се фокусираат на јавното здравје, наводно кроеле планови за лично богатење и преземање на приватни здравствени установи.

— реклама —

Партијата го повика Јавното обвинителство итно да отвори постапка за сите изнесени наводи и да постапи, како што наведуваат, неселективно и без политички калкулации, со цел целосно расчистување на случајот и воспоставување на владеење на правото.