Премиерот Христијан Мицкоски очекува во наредниот период да дојде до намалување на цените на горивата во земјава, при што бензините би можеле да поевтинат за 2,5 до 3 денари, а дизелот за околу 7 денари по литар.
Одговарајќи на новинарско прашање за можноста за подрастично намалување на цените на горивата и за состојбите на светскиот пазар, Мицкоски посочи дека поминувањето на околу 55 танкери низ Ормутскиот Теснец не претставува драматична бројка.
„Таа бројка од 55 танкери и не е нешто драматична, имајќи предвид дека на времето таа бројка била и троцифрена на ден. Овие танкери додека стигнат до конечните дестинации ќе поминат можеби и еден месец, можеби и повеќе, односно од 25 до 35 дена“, изјави Мицкоски.
Според него, цената на суровата нафта на светските пазари во следниот период би требало да се движи околу 80 долари за барел, со мали осцилации.
„Стојам на ставот дека нашите математики се тие, сега треба да ги видиме кои се математиките на Регулаторната комисија. Но очекувам поевтинување на бензините отприлика 2,5 до 3 денари и очекувам околу 7 денари намалување на дизелот по литар. Тоа е она што ние го очекуваме, но да почекаме Регулаторната комисија да излезе со нивните пресметки“, рече премиерот.
Конечната одлука за новите малопродажни цени на нафтените деривати треба да ја соопшти Регулаторната комисија за енергетика.
