И покрај забавениот раст на европската економија, Владата очекува македонската економија и годинава да продолжи со раст, кој до крајот на 2026 година би требало да се движи меѓу 3,5 и 4 проценти, изјави премиерот Христијан Мицкоски.
Одговарајќи на новинарско прашање при денешната промоција на „Градскиот воз“, Мицкоски истакна дека растот се остварува во услови кога Европската Унија, која е најголем трговски партнер на земјава, бележи раст од помалку од еден процент годишно.
„Очекувам трендот на раст да продолжи на бруто домашниот производ. Оваа Влада беше избрана на 23 јуни 2024 година и 2024 година ја завршивме со раст на БДП од 3 проценти реален, а номиналниот беше блиску 7 проценти и бевме во горната половина од земјите во Европа“, рече Мицкоски.
Тој додаде дека 2025 година земјава ја завршила со реален раст на БДП од 3,5 проценти, додека номиналниот раст бил над 8 проценти, со што, според него, Македонија била меѓу првите пет-шест земји во Европа.
За 2026 година, Владата очекува реалниот раст на БДП да биде меѓу 3,5 и 4 проценти, додека номиналниот раст да се движи околу 8 проценти.
Мицкоски оцени дека ваквите резултати се особено значајни имајќи предвид дека европската економија расте со стапка помала од еден процент, а Европската Унија е најзначајниот трговски партнер на Македонија.
Премиерот порача дека Владата има обврска да ги решава проблемите со кои се соочуваат граѓаните и да не создава нови.
„Впрочем затоа ја добивме довербата од граѓаните да ги решаваме. Дали сме мотивирани да ги решаваме, да, мотивирани сме и ќе продолжиме да ги решаваме и да не создаваме нови проблеми“, изјави Мицкоски.
