Од 2027 година патарини без рампи во Хрватска: Што треба да знаат Македонците пред патување

Хрватска од 1 март 2027 година воведува нов дигитален систем за наплата на патарини, со кој класичните наплатни рампи и долгите колони на автопатите треба да станат минато. Системот „Crolibertas“ ќе овозможи возилата да минуваат без запирање, а патарината ќе се пресметува според изминатата делница и категоријата на возилото.

Во тек е поставувањето на 212 електронски портали со камери и сензори долж околу 1.400 километри автопатишта. Новиот систем ќе функционира според принципот „слободен проток“, што значи дека возачите нема да мора да застануваат на наплатни станици.

— реклама —

За патничките возила до 3,5 тони ќе се користи автоматско препознавање на регистарските таблички. Возачите ќе треба однапред да го регистрираат возилото во системот и да поврзат платежна картичка. Втората можност е користење ENC-уред, кој ќе се отчитува додека возилото се движи.

— реклама —

За автобусите, камионите и мотоциклите користењето ENC-уред ќе биде задолжително.

Хрватска не воведува вињети, па патарината и понатаму ќе зависи од поминатите километри и категоријата на возилото. Новината е тоа што наплатата ќе се врши без физичко застанување.

— реклама —

Системот ќе ги опфати и автопатите со кои управуваат „Хрватски автопати“, но и делниците под концесија на „Бина-Истра“ и „Автопат Загреб-Мацељ“.

— реклама —

За македонските туристи ова значи дека патувањето кон хрватското крајбрежје или транзитот кон Западна Европа би требало да биде побрзо и поедноставно, особено во летната сезона кога на наплатните станици се создаваат километарски колони.

Македонските возачи ќе треба однапред да ја регистрираат својата регистарска табличка во системот и да обезбедат начин за плаќање. До почетокот на примената на новиот систем, патарините во Хрватска ќе продолжат да се плаќаат според сегашниот модел.