Од Македонија до патеките на Формула 1: Стефан Тренески со завршена сезона во Формула 4

Македонскиот автомобилист Стефан Тренески ја заврши својата прва целосна сезона во шампионатот Формула 4 Централна Европа (F4 CEZ), со настап на патеката Хунгароринг во Унгарија, на која се одржуваат и трките од Формула 1.

Според информациите доставени од неговиот тим, Тренески е првиот Македонец кој настапил во натпреварувања од формула категориите под покровителство на Меѓународната автомобилистичка федерација (ФИА).

— реклама —

Тренески во 2025 година ја освоил академијата F4 CEZ, по што кон крајот на истата година дебитирал со тимот Janík Motorsport. Во сезоната 2026 настапувал за чешкиот тим JMT Racing Engineering, управувајќи болид Tatuus F4 T-421 со стартен број 427.

Последниот натпреварувачки викенд од сезоната се одржал на Хунгароринг, во близина на Будимпешта, каде што, според доставените информации, македонскиот возач го постигнал четвртото најдобро време на тренинзите во конкуренција од 38 натпреварувачи.

На квалификациите го освоил седмото место, по што во трката се борел за повисок пласман. Сепак, добил казна од десет секунди по контакт со друг болид при рестартот, поради што официјално бил класифициран на 11. место.

— реклама —

Од тимот оценуваат дека казната била престрога, наведувајќи дека станувало збор за минимално преклопување на предното крило со друг натпреварувач.

На последната трка, според нивното објаснување, Тренески имал контакт со друг возач уште на стартот, при што му бил оштетен пневматикот. Поради тоа не успеал да ја заврши трката со посакуваниот пласман и да освои бодови.

— реклама —

И покрај ваквиот завршеток, од тимот ја оценуваат сезоната како значаен чекор во неговата спортска кариера и во претставувањето на Македонија во меѓународните автомобилистички натпреварувања.

Според доставените информации, за Тренески веќе постои интерес од други тимови во шампионатот за сезоната 2027 година. Наведуваат дека разговорите се во тек, а повеќе детали ќе бидат соопштени во наредниот период.

Формула 4 претставува една од почетните категории во системот на едноседни тркачки болиди, преку која младите возачи стекнуваат искуство за натпреварување во повисоките категории.

Во текот на сезоната, Тренески настапувал на меѓународни патеки, меѓу кои Ред Бул Ринг, Словакија Ринг, Мост, Брно и Хунгароринг.

Од неговиот тим сметаат дека настапот во целосна сезона на ова ниво претставува значаен исчекор за македонскиот автомобилизам и можност за понатамошен развој на младиот возач.