Астон Мартин наскоро ќе добие нова погонска единица од Хонда, која би требало да дебитира на Големата награда на Холандија во Зандворт. Ова го потврди главниот инженер на јапонскиот производител, Шинтаро Орихара, пред трката за Големата награда на Белгија на патеката Спа-Франкоршамп.
Орихара изјави дека на тимот му е потребно уште малку време за финализирање на новиот мотор, нагласувајќи дека искуствата од сегашната верзија се важни за понатамошниот развој на силата и ефикасноста.
„Мора да продолжиме да учиме од актуелните поставки и компоненти за да бидеме уште подобри во однос на развојот на моќноста за трките што следуваат. Пред нас се патеки како Монца, каде што долгите правци бараат максимални перформанси“, изјави Орихара.
Во Астон Мартин очигледно се насочени кон подобар втор дел од сезоната, бидејќи досега освоија само еден бод. Единствениот бод за тимот го освои Фернандо Алонсо по хаотичната завршница на трката во Монако.
Според проценките, сегашната погонска единица на Хонда е меѓу најслабите во Формула 1, па новата верзија треба да донесе значително подобрување. Вистинските очекувања, сепак, се насочени кон сезоната 2027, кога тимот ќе треба целосно да го покаже својот потенцијал под водство на легендарниот инженер Адријан Њуи.
