СДСМ преку соопштение ја обвини Владата и премиерот Христијан Мицкоски дека повторно се обидуваат да воведат модел кој, според партијата, остава простор за злоупотреби при гласањето на македонските државјани во дијаспората.
Од партијата велат дека не се против правото на дијаспората да гласа, туку против, како што наведуваат, можноста за изборни манипулации.
„Лага е дека СДСМ е против тоа дијаспората да гласа. СДСМ е против Мицкоски да гласа наместо дијаспората“, наведуваат од партијата.
Според СДСМ, по нивното противење на предлогот за електронско гласање, сега се предлага гласање по пошта, за кое оценуваат дека, без јасни механизми за контрола и верификација, носи ризик од злоупотреби и не гарантира тајност на гласањето.
Од партијата сметаат дека Државната изборна комисија треба, со консензус, да ги утврди правилата за гласање на дијаспората и предупредуваат дека нема да поддржат решенија кои, според нив, можат да доведат до изборни нерегуларности.
Во соопштението, СДСМ ја повика власта да се откаже од предложените измени и да предложи модел кој ќе обезбеди фер, безбедно и транспарентно гласање за македонските државјани што живеат во странство.
