Новак Ѓоковиќ и поранешниот американски ас Енди Родик низ годините имаа бурна историја исполнета со несогласувања, провокации и отворени судири. Родик, некогаш еден од најгласните критичари на српскиот тенисер, долго време го обвинуваше дека глуми повреди и намерно предава мечеви, а самиот призна дека еднаш дошло и до физички контакт меѓу нив во соблекувална.
„Не сакам да откријам со кого имав судир, но ќе ви кажам дека името му се римува со ‘Шмовак Шмоковиќ’“, изјави Родик.
Според него, инцидентот се случил на еден УС Опен, кога, по неговите провокации пред мечот, Ѓоковиќ го победил на теренот, а потоа продолжил да го „цврчори“ во соблекувалната.
„Веднаш скокнав кон него, го фатив и го турнав во ормарите“, откри Американецот. Тогашните медиуми тврдеа дека се работи за турнирот во 2008 година, кога Родик цинично изјави дека Ѓоковиќ е „единствениот играч на светот кој со 16 повреди може да добие меч“.
Две децении подоцна, реториката е сосема поинаква. Додека уште траат шпекулациите за евентуалната пензија на Ѓоковиќ, 38-годишниот Србин неодамна го освои својот 101. трофеј и покажа дека крајот не е на повидок. Родик, негов поранешен ривал и критичар, денес зборува со огромно почитување, споредувајќи го со Леброн Џејмс.
„Во спортот сè земаме здраво за готово“, рече тој. „Леброн се врати по еден месец пауза и веднаш запиша 12 асистенции. Тоа е неверојатно. Тој е во својата 23-та НБА сезона и сè уште знае како да биде најдобрата верзија од себе. Исто е и со Новак“.
Родик посочува дека и Ѓоковиќ и Леброн се соочуваат со годините и повредите, но успеваат да останат врвни благодарение на интелигентна адаптација, искуство и неверојатна ментална сила.
Американецот ја истакна и сезоната 2025 како една од најимпресивните што ги видел, потсетувајќи на легендарниот поход на Џими Конорс на УС Опен во 1991 година, кој на 39 години стигна до едно полуфинале – подвиг што тогаш беше прогласен за чудо.
„Новак е една до една и пол година помлад од Конорс во таа сезона, а успеа да стигне до четири полуфиналиња на Грен слем турнирите оваа година“, рече Родик. „Не смееме да го земаме тоа здраво за готово. Тоа што го направи е навистина неверојатно.“
Од некогашна соблекувална полна со искри до денешни јавни пофалби, врската меѓу Родик и Ѓоковиќ најдобро го одразува она што многумина го немаат храброст да го признаат: дека тенисерот од Србија, и на 38 години, го продолжува својот пат како најконстантен и најуспешен играч на својата ера.
