Од утре клиентите на „Алта банка“ без картички ќе можат да подигнат до 20.000 денари, шалтерите ќе работат и во сабота

Од утре, 5 ноември, клиентите на „Алта банка“ АД Битола кои имаат платежни сметки, но не поседуваат платежни картички, ќе можат да подигнат готовина на шалтерите во главната филијала во Битола. Максималниот износ што ќе можат да го повлечат е 20.000 денари во период од две недели, информира Народната банка.

— реклама —

Исплатата ќе се врши на повеќе шалтери во филијалата на улицата „Добривое Радосављевиќ“ бр. 21, а услугата првенствено е наменета за пензионерите и примателите на социјална помош кои средствата ги добиваат преку сметки во банката.

— реклама —

Клиентите ќе добијат СМС-пораки со известување за датумот и времето кога треба да дојдат за подигање на парите. Исплатите ќе се организираат во текот на повеќе денови, според однапред утврден распоред.

Од Народната банка апелираат граѓаните да ги почитуваат добиените термини и да не доаѓаат порано или во денови кога не се повикани, за да се избегнат метеж и подолго чекање. За оние кои нема да можат да дојдат во предвидениот термин, ќе бидат обезбедени дополнителни можности за исплата.

— реклама —

Од петок, 6 ноември, вклучително и во сабота, 7 ноември, филијалата ќе работи во две смени. Шалтерите ќе бидат наменети исклучиво за подигање готовина, без можност за извршување други трансакции.

— реклама —

Народната банка најави дека се подготвува отворање шалтери и во други градови, наменети за пензионерите и примателите на социјална помош. Дополнителните информации за организацијата на исплатите ќе бидат објавени наскоро.