Српската „Алта банка“ има три дена да одлучи за продажба на акциите во Битола, потоа постапува Народната банка

Српската „Алта банка“ има рок од три дена да се изјасни дали самостојно ќе ги понуди на продажба акциите што ги поседува во „Алта банка“ АД Битола. Доколку тоа не се случи, постапката ќе ја преземе Народната банка на Македонија, која најави дека акциите ќе бидат понудени преку Македонската берза.

Гувернерот Трајко Славески соопшти дека до надлежниот регулатор во Србија е испратено известување со барање за одговор во рок од три дена. Тој најави дека, независно од одговорот, по истекот на десет дена Народната банка ќе ги понуди акциите на продажба. Според него, веќе постои интерес од потенцијални инвеститори од земјата и од странство.

— реклама —

Станува збор за доминантниот пакет од 95,336 отсто од акциите на битолската банка, кој е во сопственост на „Алта банка“ АД Белград. На белградската банка на 1 ноември ѝ беше одземена согласноста за квалификувано учество во финансиската институција во Македонија.

Продажбата, доколку ја спроведе Народната банка, ќе се одвива според законски утврдена постапка преку јавна берзанска аукција. Почетната цена ќе се определува согласно со членот 138 од Законот за банките, врз основа на просекот на официјалните дневни цени во последните три месеци пред донесувањето на решението. Доколку немало соодветни трансакции, ќе се земе предвид книговодствената вредност.

— реклама —

Случувањата се последица на одлуката на Народната банка на Србија од 30 октомври, со која на „Алта банка“ АД Белград ѝ беше одземена дозволата за работа. Српскиот регулатор соопшти дека по спроведените контроли утврдил сериозно влошување на финансиската состојба и ризици за интересите на депонентите. Биле исполнети и условите за поведување стечајна постапка, а управувањето со банката било пренесено на српската Агенција за осигурување депозити.

На 1 ноември, Народната банка на Македонија воведе тримесечна администрација во „Алта банка“ АД Битола. За администратори беа именувани Илија Андовски, Весна Стојчевска и Марија Тодоровска, кои ги презедоа надлежностите на управниот и надзорниот одбор, како и на собранието на акционери, со исклучок на одлуката за зголемување на капиталот.

— реклама —

Од битолската банка образложија дека мерката е преземена за заштита на имотот, репутацијата и интересите на депонентите и доверителите по проблемите со доминантниот акционер во Србија.

За потребата од промена на сопственичката структура говореше и поранешниот министер за финансии Кирил Миноски во гостувањето во „Ноќно студио“ на 4ТВ. Тој оцени дека проблемите со сопственикот во Белград ја нарушиле довербата во банката во Македонија и дека е потребно решение што ќе ја гарантира сигурноста на клиентите и нивните депозити.

— реклама —

Миноски предупреди дека задржувањето на истиот сопственик би можело да предизвика масовно повлекување средства, на што ниту една банка не може неограничено да одговори во краток период.

Сега останува најавениот интерес од потенцијалните инвеститори да се претвори во конкретни понуди. Гувернерот Славески посочи дека секој нов сопственик ќе мора да ги исполни законските и супервизорските услови за да се обезбеди долгорочна стабилност и непречено работење на банката.