Сообраќајот на државните патишта низ земјава утрово се одвива непречено и по суви коловози, а на граничните премини од македонска страна нема подолги задржувања за влез и излез од државата, информираат од АМСМ.
Интензитетот на сообраќајот надвор од градските средини е умерен, а од АМСМ апелираат до возачите да ја прилагодат брзината на движење, да ја почитуваат сообраќајната сигнализација и внимателно да управуваат со возилата, особено на патиштата низ котлините, речните долини и клисурите, каде што постои можност од појава на одрони.
Посебна внимателност се препорачува на делниците Катланово – Велес, Маврово – Дебар – Струга, Виница – Берово и Кочани – Делчево.
Од утре па сè до 31 август на државните патишта ќе биде воведен летен временски режим на сообраќај, со кој се забранува движење на тешки товарни возила со вкупна маса над 15 тони во текот на викендите и во денови со екстремно високи температури.
Забраната ќе важи во следните термини: во петок од 17:00 до 22:00 часот, во сабота од 09:00 до 18:00 часот и во недела од 09:00 до 22:00 часот.
Во деновите кога Министерството за здравство ќе прогласи екстремно високи температури, ограничувањето ќе важи и од понеделник до четврток, во периодот од 11:00 до 17:00 часот.
Ограничувањето не се однесува на возила што превезуваат животни, цвеќе, хуманитарна помош, жито и житни култури, леснорасиплива стока, нафта и нафтени деривати, опасни материи, како и возила ангажирани на проекти на државните патишта.
Од АМСМ потсетуваат дека до 1 септември на магистралниот пат А2, на делницата Скопје – Охрид – Скопје, останува во сила и забраната за движење на тешки товарни возила над 7,5 тони за време на викендите.
Овој режим е воведен со цел да се намалат сообраќајните застои кон Охрид, да се обезбеди побрз проток на возила и непречено движење на туристите во текот на летната сезона.
