Привремено се забранува риболовот на Мавровското Езеро, а ќе биде ограничено и користењето на пловни објекти поради одржувањето на Светското првенство во риболов.
Од Јавната установа Национален парк „Маврово“ информираат дека забраната за спортски, рекреативен и секој друг вид риболов стапува во сила од 26 август и ќе трае до 7 септември 2026 година, односно до целосното завршување на првенството.
Одлуката е донесена со цел да се заштити вонредно извршеното порибување, наменето за натпреварот, кој е официјален настан од највисок ранг во рамките на FIPSed.
Во истиот период се забранува, односно се ограничува и пловидбата и користењето на сите пловни објекти на Мавровското Езеро.
Од забраната се изземени пловните средства на полицијата, службите за спасување и другите надлежни институции, кога нивното користење е неопходно за безбедноста и организацијата на настанот.
Од Националниот парк ги информираат спортските риболовци и останатите корисници на езерото да ги почитуваат мерките во наведениот период.
