Почетокот на зонското паркирање во зона Д12 – Реонски Центар во Општина Аеродром се одложува, соопшти ЈП Градски паркинг Скопје, по насоки од Град Скопје и Општина Аеродром и по барање на граѓаните.
Од претпријатието информираат дека наместо на 1 април 2026 година, зоната нема да започне со работа сè додека не се завршат сите неопходни подготовки и усогласувања.
„По насоки од Град Скопје и Општина Аеродром и во интерес на граѓаните и нивното барање за одложување на почеток на зонското паркирање на зона Д12 – Реонски Центар, Јавното претпријатие ‘Градски паркинг’ – Скопје ги известува граѓаните дека се пролонгира започнувањето со работа на зоната, предвидено за 01.04.2026, сè до комплетирање на сите неопходни активности“, соопштија од претпријатието.
Како што се наведува, одложувањето значи и целосно усогласување на сообраќајниот проект за новите зони, како и поставување на соодветна сигнализација.
„Тоа подразбира целосна усогласеност на сообраќајниот проект за зонско паркирање за новата зона Д11 – Ново Лисиче и поставување на соодветна вертикална и хоризонтална сигнализација“, соопштија од „Градски паркинг“.
Од таму посочуваат дека целта е воведувањето на зонското паркирање да биде спроведено без дополнителен притисок врз граѓаните.
„Целта е имплементацијата на зонското паркирање во овој дел од градот да биде комплетна, правична и паралелна, без притисок и прелевање на проблемот со паркирање од една во друга зона“, соопштија од претпријатието.
Надлежните очекуваат дека реализацијата на зонското паркирање во двете подзони Д11 и Д12 ќе започне во текот на мај.
„Се надеваме дека во текот на месец мај 2026 ќе се отпочне со реализација на зонско паркирање во двете субзони Д11 и Д12“, соопштија од „Градски паркинг“.
Истовремено, се одложува и процесот на прибирање документација од заинтересираните корисници.
„Истовремено, го одложуваме процесот за прибирање на потребната документација од заинтересираните корисници за паркирање“, соопштија од претпријатието.
