Одложена целосната примена на новите гранични контроли во девет земји од ЕУ, меѓу нив и Грција

Девет земји од Европската Унија, меѓу кои и Грција, наводно ја одложиле целосната примена на европскиот систем за влез и излез (EES), барајќи повеќе време за да се осигурат дека новите гранични контроли ќе функционираат без да предизвикуваат застои на фреквентните аеродроми, пишува „Екатимерини“.

— реклама —

Системот бара државјаните на земји кои не се членки на ЕУ, а патуваат во Шенген-зоната, при влез или излез од блокот да остават отпечатоци од прстите и да направат скенирање на лицето.

На Франција, Белгија, Холандија, Германија, Грција, Малта, Португалија, Италија и Швајцарија, наводно, им било дозволено да ги одложат проверките за да се помогне во „одржувањето на непреченото одвивање на граничниот сообраќај“, објави лондонски „Сандеј тајмс“, повикувајќи се на долгите редици на границите и техничките проблеми со системот.

— реклама —

Ова лето на некои грчки аеродроми имаше големи застои, а долги колони се создаваа и на северните граници на Грција со Македонија, Албанија, Бугарија и Турција, додека службениците се соочуваа со проблеми при воведувањето на новиот систем.

— реклама —

EES започна постепено да се воведува во октомври минатата година и првично се очекуваше целосно да биде ставен во функција до април. Последователно, земјите добија преоден период од 150 дена, во кој можеа да ги суспендираат проверките во периоди на зголемен сообраќај во текот на летото, со цел да се спречат застои.

Овој период истече на 6 септември, но деветте земји, наводно, ја информирале Европската комисија дека нема целосно да ги спроведуваат новите контроли сè додека неопходната технологија и системи не функционираат правилно.

Според „Сандеј тајмс“, Брисел неформално се согласил со одложувањето.