Одлуката на Трамп беше поништена од судот: САД ќе ги враќаат обележјата за ропството

Федерална судијка во САД ѝ нареди на американската влада да ги поништи измените направени на спомениците, меморијалите и информативните табли посветени на ропството, расизмот и дискриминацијата во националните паркови и јавните простори.

— реклама —

Окружната судијка од Бостон, Ејнџел Кели, оцени дека со ваквите потези владата се обидела да ја прекрои националната историја. Нејзината привремена одлука се однесува на Службата за национални паркови, која е надлежна за управување со јавните споменици, додека конечната судска одлука сè уште не е донесена.

— реклама —

Американскиот претседател Доналд Трамп во март минатата година му наложи на Министерството за внатрешни работи да ги преиспита сите споменици, плочи и статуи со цел да утврди дали ја прикажуваат историјата на САД во негативно светло.

— реклама —

Како последица на тоа, низ земјата беа отстранети повеќе обележја поврзани со ропството, меѓу кои и информативната табла за робовите во домот на првиот американски претседател Џорџ Вашингтон во Филаделфија. По поднесена тужба од градските власти, таа подоцна повторно беше поставена. На повеќе локации беа отстранети и содржини поврзани со климатските промени.

— реклама —

Судијката Кели истакна дека САД мора да ја раскажат целосната историја на земјата, особено во пресрет на 250-годишнината од независноста. Таа ѝ даде рок од 21 ден на владата да ги врати сите отстранети споменици и да ги поништи направените измени.