СДСМ преку соопштение реагира на првостепената пресуда на Специјализираните совети во Хаг против Хашим Тачи и уште тројца обвинети, порачувајќи дека одлуките на меѓународните судови мора да се почитуваат, додека жалбената постапка сè уште трае.
Од партијата велат дека процесот не е завршен и повикуваат на почитување на судската одлука, како и на избегнување поттикнување тензии и поделби.
„СДСМ не се меша во работата на судот. Не кроиме пресуда според коалиција, нација или моментален интерес. Ако судот донел одлука за некој дека е виновен – тогаш тоа треба да се прифати, додека повисок суд не каже друго“, стои во реакцијата.
Од СДСМ посочуваат дека истото го застапувале и во случајот со Ратко Младиќ, нагласувајќи дека законот не треба да се применува различно во зависност од националноста.
Во реакцијата се критикуваат и изјавите на претседателот на Собранието, Африм Гаши, кои СДСМ ги оценува како „крајно несоодветни“, со образложение дека тој извршува државна функција и ја претставува државата која, како што наведуваат од партијата, сака да биде дел од Европската Унија.
„Ова не е пресуда против албанскиот народ. Не е пресуда против правото на Косово на слобода. Судот суди поединци“, наведуваат од СДСМ, додавајќи дека пресудата не треба да се претвора во етничко прашање.
Од партијата прават споредба и со состојбите во домашното правосудство, тврдејќи дека кај нас премиерот се меша во работата на судовите и обвинителството, предметите се тргаат, а Европската комисија во своите извештаи укажува на притисоци врз правосудството.
СДСМ порачува дека ќе ја почитува судската одлука и повторува дека „никој не е над законот“ – ниту во Хаг, ниту во Македонија.
