(Видео) „Стив Наумов“ прокиснува по реконструкцијата од 10 милиони евра, тврди СДММ

Помалку од еден месец по реконструкцијата на студентскиот дом „Стив Наумов“ во Скопје, во објектот веќе има влага, протекување вода и проблеми со греењето и топлата вода, тврди потпретседателот на Социјалдемократската младина на Македонија (СДММ), Бојан Цветаноски.

Тој обвини дека и покрај вложените 10 милиони евра во реконструкцијата, студентите и натаму се соочуваат со несоодветни услови за живеење.

— реклама —

„Ниту еден месец не издржа реконструкцијата на студентскиот дом ‘Стив Наумов’! Влага, вода што протекува од сите страни, нема греење, нема топла вода! Нели ‘Стив’ ќе беше хотел од А-категорија? Вака ли изгледа хотел од А-категорија, со прокиснати соби и влага по ѕидовите?“, праша Цветаноски.

Според него, наместо подобрување на условите за сместување, студентите се соочуваат со проблеми во секојдневното функционирање, иако, како што тврди, партиципацијата за сместување е двојно зголемена.

— реклама —

„За што студентите плаќаат 6.600 денари месечно? За прокиснати соби и мизерни услови?“, праша потпретседателот на СДММ.

Цветаноски побара објаснување за начинот на кој биле потрошени средствата за реконструкцијата, отворајќи сомнежи за постапките за јавни набавки.

„За што се потрошија милионите? Каде завршија парите? Повторно во сомнителни партиски тендери?“, рече тој, обвинувајќи ја власта дека набавката на автомобили на лизинг ѝ е поважна од обезбедувањето достоинствени услови за студентите.

— реклама —

Од СДММ бараат итна проверка на состојбата во студентскиот дом, јавно објавување на сите трошоци и договори поврзани со реконструкцијата, како и утврдување одговорност за евентуалните пропусти.

„За секој потрошен денар мора да има отчет“, порача Цветаноски, додавајќи дека студентите заслужуваат достоинствени услови за живот.

Тврдењата за состојбата во домот и за начинот на трошење на средствата се изнесени од СДММ, а во доставеното соопштение нема став од надлежните институции.