Министерот за надворешни работи и надворешна трговија, Тимчо Муцунски, оцени дека одлуките донесени на Самитот на НАТО во Анкара ќе придонесат за дополнително зајакнување на Алијансата и унапредување на колективната безбедност.
Во објава на социјалните мрежи, Муцунски истакна дека самитот испратил јасна порака за единството на НАТО и неговата посветеност на зајакнување на одбранбените капацитети.
„Пораката е јасна – НАТО испорачува резултати. Ја потврдивме заедничката определба за поголеми инвестиции во одбраната, понатамошно јакнење на одбранбените капацитети, поправедна распределба на одговорностите меѓу сојузниците и континуирана поддршка за Украина“, напиша министерот.
Тој информираше дека за време на Самитот остварил повеќе билатерални средби со министри и високи претставници од земјите членки на НАТО, како и со претставници на партнерските држави. На средбите, како што посочи, се разговарало за билатералната соработка, активностите во рамките на Алијансата, како и за актуелните регионални и глобални безбедносни предизвици.
Муцунски порача дека Македонија ќе продолжи активно да придонесува кон зајакнувањето на колективната безбедност, стабилноста и единството на НАТО како посветен и кредибилен сојузник.
