Одземени пасоши и забрани за работа: Кривичниот суд определи мерки за претпазливост за 10 лица поврзани со акцијата во УЈП

Во врска со вчерашната акција на Обвинителството за гонење на организиран криминал и корупција, која е поврзана со истрага за незаконски дејствија во Управа за јавни приходи, до Основниот кривичен суд Скопје бил доставен предлог за определување мерки за претпазливост против вкупно 10 лица.

— реклама —

Од Кривичниот суд информираат дека девет од осомничените биле спроведени пред судија на претходна постапка, каде што дале свое произнесување по предлогот на обвинителството. По разгледување на наводите, судијата го прифатил предлогот и на сите девет лица им определил мерки за претпазливост.

— реклама —

— реклама —

Станува збор за мерки согласно точките 2, 3, 6 и 7 од Законот за кривична постапка, кои опфаќаат одземање на патната исправа, обврска за редовно јавување во суд, забрана за комуникација со определени лица, како и забрана за вршење одредени работни активности поврзани со предметот на истрагата.

За десеттото лице, како што соопштуваат од Судот, постапката за определување мерки ќе се спроведе дополнително, согласно законските процедури. Од Основниот кривичен суд Скопје нагласуваат дека мерките се определени со цел обезбедување непречено водење на кривичната постапка и спречување можни влијанија врз сведоци или повторување на делото.