Инспекторка од АХВ земала 250 евра за да издаде позитивен записник

Основното јавно обвинителство Скопје донесе наредба за спроведување истражна постапка против 42-годишна вработена во Агенцијата за храна и ветеринарство, осомничена за кривично дело „примање поткуп“.

— реклама —

Според Обвинителството, осомничената, во својство на службено лице – инспектор за храна, во периодот од 17 до 25 септември побарала и примила 250 евра од управител на правно лице.

— реклама —

Парите, според наводите на ОЈО, биле побарани за инспекторката да изготви записник во кој ќе констатира дека извршила инспекциски надзор и дека при контролата не биле утврдени неправилности во работата на објектот, односно дека биле исполнети потребните процедури.

— реклама —

Поради опасност од бегство, можност за влијание врз оштетениот и неговиот исказ, како и ризик од повторување на делото, јавниот обвинител до судијата на претходна постапка доставил предлог за определување мерка притвор.

Истрагата продолжува согласно со законските процедури.