Вработена во Агенцијата за храна и ветеринарство е лишена од слобода и кривично пријавена под сомнение дека побарала и примила 250 евра поткуп за да прикрие утврдени неправилности при инспекциски надзор.
Одделот за сузбивање на организиран и сериозен криминал при МВР до Основното јавно обвинителство Скопје поднел кривична пријава против Д.М. (42) од Скопје поради постоење основи на сомнение за сторено кривично дело „примање поткуп“ по член 357 став 1 од Кривичниот законик.
Пријавената, која била вработена во Агенцијата за храна и ветеринарство како државен инспектор за храна, во периодот од 17 до 25 септември извршила редовна контрола во угостителски објект.
Според МВР, таа побарала 250 евра за да изготви записник во кој ќе наведе дека при инспекцискиот надзор не биле утврдени неправилности во работењето на правното лице.
Иако, според пријавата, била запознаена дека објектот не ги поседувал процедурите за добра производна храна и добра хигиенска пракса, инспекторката на 25 септември го примила договорениот износ, а потоа му го предала на оштетениот записникот од извршениот инспекциски надзор.
Од МВР информираат дека за случајот е поднесена кривична пријава до ОЈО Скопје.
