СДСМ преку соопштение обвини дека во случајот со загадената вода во Гостивар, Основното јавно обвинителство и надлежните институции ја ставиле тајноста на истрагата пред заштитата на здравјето на граѓаните.
Од партијата тврдат дека загадувањето на водата започнало уште на 25 јуни, а институциите, наместо веднаш да преземат мерки и да ја информираат јавноста, со недели молчеле и дозволиле граѓаните да користат, како што наведуваат, фекално загадена вода. Според СДСМ, само неколку дена пред отворањето на истрагата, водата била јавно прогласена за безбедна.
Во соопштението се наведува дека истрагата била отворена по допрен глас од Основното јавно обвинителство, а не по иницијатива на здравствените институции, што, според партијата, укажува на сериозни институционални пропусти.
СДСМ оценува дека повикувањето на тајноста на истрагата не смее да биде причина за необјавување информации од јавен здравствен интерес, нагласувајќи дека квалитетот на водата за пиење треба навремено да им биде соопштен на граѓаните.
Партијата смета дека сите кои имале сознанија за загадувањето, а не презеле мерки за заштита на здравјето на граѓаните, треба да понесат одговорност. Притоа, повика на оставки од министерот за здравство, директорот на Институтот за јавно здравје и од сите надлежни лица кои, според нив, не постапиле соодветно во случајот.
СДСМ порачува дека заштитата на здравјето на граѓаните мора да има предност пред формалните процедури и дека институциите не смеат да ја користат тајноста на истрагата како оправдување за непостапување.
