Основното јавно обвинителство Скопје отвори предмет по допрен глас за да ги провери информациите за сериозно загадување на природата со отпад во заштитеното подрачје во близина на изворите Рашче.
Надлежен јавен обвинител ќе ги координира активностите на Државниот инспекторат за животна средина и другите надлежни инспекциски служби, кои треба да извршат проверки на терен.
Во рамки на проверките ќе се утврдува потеклото на депонираниот отпад, како и дали и во која мера тој предизвикал последици врз животната средина.
Од ОЈО Скопје информираат дека доколку се утврдат елементи на кривично дело против животната средина и бидат идентификувани одговорни лица, обвинителството ќе преземе соодветни мерки за кривично гонење.
