ОЈО за трагедијата кај Богданци: Првичните индиции упатуваат на убиство и самоубиство

Првичните сознанија од истрагата за трагедијата во близина на Богданци упатуваат на убиство и самоубиство, информираат од Основното јавно обвинителство Гевгелија. Јавен обвинител извршил увид на местото на настанот и издал повеќе наредби за обезбедување докази, со цел да се утврдат причините и сите околности под кои настапила смртта на двете лица.

— реклама —

Од Обвинителството дополнуваат дека на 16 октомври била поднесена пријава за загрозување на сигурноста, по која веднаш започнало постапување. Во меѓувреме, во граѓанска постапка, на лицето му биле определени и мерки за заштита од семејно насилство.

Наредена е обдукција на телата на починатите, а обезбедени се и снимки од видео-надзор. Од Обвинителството посочуваат дека, и покрај првичните индиции, настанот ќе биде целосно испитан.

— реклама —

Двете тела биле пронајдени во близина на местото викано „Ичева чешма“, во Горно село кај Богданци. Едното, на 21-годишно момче од Богданци, било пронајдено покрај опожарен автомобил, додека второто тело било откриено во внатрешноста на изгореното возило.

— реклама —

Случајот бил пријавен на 3 ноември, во 18:40 часот, кога Т.К. од Богданци ја известил полицијата дека забележал запален паркиран автомобил, во чија близина имало безживотно тело. На местото пристигнале полициски службеници од Полициската станица Гевгелија, кои утврдиле дека починатото лице е В.Г. (21) од Богданци.

Смртта на младото момче ја констатирала екипа на Итната медицинска помош од Општата болница во Гевгелија. По интервенцијата на противпожарната бригада и гаснењето на пожарот, во внатрешноста на автомобилот било забележано уште едно опожарено тело, кое исто така не давало знаци на живот.

— реклама —

Идентитетот на лицето пронајдено во автомобилот, како и причините за смртта на двајцата починати, треба да бидат утврдени со обдукцијата. Истрагата продолжува со цел целосно расчистување на случајот.