Околу 10.800 средношколци од септември учат по нови стручни програми

Околу 10.800 ученици запишани во прва година во средните стручни училишта се првата генерација што ќе се образува според модернизирани наставни програми, во кои се вклучени СТЕМ-компетенции, зелени технологии и дигитални вештини.

— реклама —

Реформата во стручното образование има цел, покрај стручните знаења, учениците да стекнат и вештини поврзани со технолошкиот развој, зелената транзиција и потребите на современиот пазар на трудот.

За спроведување на новите наставни програми досега се обучени 569 наставници, а подготвени се и нови материјали за учење. Министерството за образование и наука посочува дека е зајакната и соработката со приватниот сектор, со цел учениците да стекнуваат повеќе практични знаења и вештини.

— реклама —

Промените опфаќаат повеќе стручни области. Учениците од економските струки ќе изучуваат модели на зелени бизниси и одржливи иновации, додека во угостителско-туристичките струки ќе се изучуваат начини за намалување на отпадот од храна и примена на одржливи практики.

— реклама —

Зелените и дигиталните компетенции ќе бидат вклучени и во останатите стручни области, со што учениците треба да стекнат пошироки знаења применливи во различни професии.

Министерката за образование и наука Весна Јаневска оцени дека модернизирањето на стручното образование треба да им овозможи на младите да стекнат вештини значајни за нивниот професионален развој, а на компаниите да им обезбеди кадар подготвен за новите барања на пазарот.

Новите програми треба да придонесат и за развој на техничкото знаење, решавањето проблеми, иновативноста и способноста на учениците полесно да се приспособуваат на промените во професиите и технологијата.