Состојбата со онлајн и мобилните измами е полоша од кога било, покажуваат најновите истражувања и извештаи. Според податоците од центарот Pew Research, дури 73 проценти од возрасните во Соединетите Американски Држави биле жртви на некаков вид онлајн измама, при што проблемот не е ограничен на одредена возрасна група.
Многу корисници пријавуваат дека редовно добиваат измамнички телефонски повици, пораки или електронска пошта, најчесто барем еднаш неделно. Во исто време, нов извештај на CNET предупредува дека развојот на нови технологии, особено вештачката интелигенција и клонирањето на глас, значително ги зголемува и убедливоста и зачестеноста на ваквите измами.
Измамниците сѐ почесто се претставуваат како вработени во банки, државни институции или дури како блиски членови на семејството, со цел да извлечат лични и финансиски податоци од жртвите.
Експертите нагласуваат дека клучна е претпазливоста и користењето на здрав разум при комуникација преку телефон, пораки и интернет. Една од основните препораки е никогаш да не се јавувате на непознати броеви и секогаш да проверувате преку официјални контакти, на пример бројот на банката наведен на картичката.
Исто така, се советува никогаш да не се споделуваат лични податоци преку телефон или електронска пошта, бидејќи дури и навидум безопасни информации можат да се искористат за пристап до финансиски сметки преку таканаречен социјален инженеринг.
Посебно внимание се препорачува и при отворање линкови, особено ако доаѓаат од непознати извори или од институции кои наводно бараат итна акција. Во такви случаи, експертите советуваат рачно внесување на веб-адресата на официјалната институција.
Меѓу препораките се и користење двофакторска автентикација, како дополнителен слој на заштита, како и поставување посилни и уникатни лозинки за различни сервиси.
Во извештаите се наведува дека и технолошките компании нудат дополнителни алатки за заштита, како услуги за блокирање измамнички повици, кои кај некои оператори се бесплатни, додека кај други се достапни со месечна претплата.
