„Опозициските тврдења ги демантира извештајот на Евростат за куповната моќ, Македонија е пред сите земји од регионот“, вели Мицкоски

Премиерот Христијан Мицкоски оцени дека најновиот извештај на Евростат за куповната моќ ги демантира тврдењата на опозицијата, истакнувајќи дека Македонија не е на дното на европската листа, туку, како што рече, е пред сите земји од регионот и пред неколку земји членки на Европската Унија.

— реклама —

Одговарајќи на новинарско прашање по потпишувањето на договорите за финансирање на железничката делница Крива Паланка – Деве Баир, Мицкоски рече дека во изминатите денови опозицијата и дел од медиумите воделе, како што оцени, „плитка кампања“ околу податоците на Евростат.

— реклама —

„Македонија не е најслаба, туку е подобра од неколку земји од Европската Унија и пред сите земји од регионот кога станува збор за куповната моќ на граѓаните“, изјави премиерот.

Тој додаде дека според него е видлив напредокот во однос на состојбата од пред три до четири години, но нагласи дека Владата не е задоволна со постигнатото и ќе продолжи да работи на подобрување на животниот стандард.

— реклама —

„Ако тоа се спореди со бројките од пред три-четири години, може да се забележи значаен напредок. Дали е тоа доволно? Не е. Ќе продолжиме уште повеќе и уште подобро да работиме за граѓаните и за државата“, рече Мицкоски.

Премиерот додаде дека, според него, опозицијата ќе продолжи со, како што кажа, „конструкции и лаги“, додека Владата ќе остане фокусирана на реализација на своите политики и економскиот развој на земјата.