Околу 7.500 ученици од основните училишта во Општина Аеродром и оваа учебна година ќе добијат бесплатни училишни униформи. Униформите ќе бидат распределени во сите основни училишта на територијата на општината најдоцна до 20 септември.
Градоначалникот на Општина Аеродром, Дејан Митески, денеска го посети ООУ „Ѓорѓија Пулевски“, каде што на учениците им ги додели униформите.
Секој ученик добива комплет составен од две поло-маички, две блузи со долги ракави и еден дуксер, наменети за користење во текот на учебната година.
Од Општина Аеродром посочуваат дека со обезбедувањето бесплатни униформи се создаваат еднакви услови за сите ученици, а истовремено се олеснуваат и трошоците за семејствата на почетокот на учебната година.
Проектот е дел од континуираните активности на општината за подобрување на условите во основните училишта и создавање уредна, современа и еднаква училишна средина за сите ученици.
